ដោយយល់ឃើញពីសារៈសំខាន់នៃនយោបាយឈ្នះ ឈ្នះ ដែលជាមូលដ្ឋាននៃការអភិវឌ្ឍកម្ពុជាឱ្យឈានមកដល់បច្ចុប្បន្ន និងឆ្ពោះទៅមុខ និងដោយសង្កេតឃើញថា ការយល់ដឹងអំពីអត្ថប្រយោជន៍នៃនយោបាយឈ្នះ ឈ្នះនេះ ក្នុងសង្គមជាពិសេសស្រទាប់យុវជននៅមានកម្រិតនៅឡើយ មូលនិធិម៉ានី បានផ្តួចផ្តើមគំនិតឱ្យមានការផលិតជាភាពយន្តឯកសារប្រវត្តិសាស្ត្រក្រោមចំណងជើងថា៖ «កម្ពុជា៖ បន្ទាត់ឆ្នាំ១៩៩៨» ដោយមានកិច្ចសហការពីខាងស្ថានីយទូរទស្សន៍BTV និងសហភាពសហព័ន្ធយុវជនកម្ពុជា។
១.គោលបំណង
គោលបំណងនៃការផលិតភាពយន្តឯកសារប្រវត្តិសាស្ត្រ «កម្ពុជា៖ បន្ទាត់ឆ្នាំ១៩៩៨» គឺ (១) ដើម្បីបញ្ជ្រាបនូវចំណេះដឹងអំពីសារៈសំខាន់នៃនយោបាយឈ្នះ ឈ្នះ ដល់សាធារណជន ជាពិសេសយុវជនជំនាន់ក្រោយ តាមរយៈការកំណត់យកឆ្នាំ១៩៩៨ ជាបន្ទាត់នៃការប្រៀបធៀបស្ថានភាពកម្ពុជាមុនឆ្នាំ១៩៩៨ និងឆ្លុះបញ្ចាំងនូវការរីកចម្រើនរបស់កម្ពុជាក្រោយឆ្នាំ១៩៩៨ រហូតមកដល់បច្ចុប្បន្ន ក៏ដូចជាទស្សនវិស័យឆ្ពោះទៅអនាគត និង(២) ដើម្បីតម្កល់ទុកជាឯកសារប្រវត្តិសាស្ត្រសម្រាប់ជាតិយើងតទៅមុខ។
២.ការផលិត
គម្រោងការផលិតត្រូវបានចាប់ផ្តើមតាំងពីខែកក្កដា ឆ្នាំ២០១៩ រហូតដល់ខែសីហា ២០២០។
ភាពយន្តឯកសារប្រវត្តិសាស្ត្រ «កម្ពុជា៖ បន្ទាត់ឆ្នាំ១៩៩៨» ត្រូវបានផលិតឡើងក្នុងទម្រង់វីដេអូឯកសារខ្លី(Short Documentary) ដែលមានរយៈពេល ៣០ នាទី ដោយក្រុមការងារបានដាក់បញ្ចូលនូវធាតុសំខាន់ៗមួយចំនួនរួមមាន៖ សម្រង់វីដេអូខ្លីនៃកិច្ចសម្ភាសឥស្សរជន កិច្ចសម្ភាសប្រជាពលរដ្ឋ វីដេអូនៃព្រឹត្តិការណ៍ប្រវត្តិសាស្ត្រនានា សំលេងនិទានខ្លឹមសារ និងការរចនាក្រាហ្វិកមួយចំនួន ។ ភាពយន្តឯកសារនេះ ត្រូវបានផលិតឡើងដោយផ្តោតលើបទពិសោធន៍ពីវិស័យចំនួនបួនគឺ វិស័យការពារជាតិ វិស័យសេដ្ឋកិច្ច វិស័យការបរទេស និងកិច្ចសហប្រតិបត្តិការអន្តរជាតនិងវិស័យទេសចរណ៍ ក្នុងគោលបំណង ដើម្បីទទួលបាននូវសុក្រឹតភាពព័ត៌មាន និងភាពជាក់ស្តែង ច្បាស់លាស់នូវព្រឹត្តិការណ៍ដែលបានកើតឡើង ក៏ដូចជាវឌ្ឍនភាពកម្ពុជាមុនឆ្នាំ១៩៩៨ រហូតមកដល់បច្ចុប្បន្នលើវិស័យទាំងបួន។ តួអង្គ សំខាន់ៗក្នុងភាពយន្តរួមមាន៖ សម្តេចពិជ័យសេនា ទៀ បាញ់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឯកឧត្តមឧបនាយករដ្ឋមន្ត្រី ប្រាក់ សុខុន និងឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍។ ឥស្សរជនទាំងបួនរូបបានផ្តល់កិច្ចសម្ភាសស្តីពីនយោបាយឈ្នះ ឈ្នះ និងវិស័យក្នុងបន្ទុករៀងៗខ្លួន។
ទន្ទឹមនេះ ក៏បានតួអង្គប្រជាពលរដ្ឋពីររូប ដែលម្នាក់ជាអតីតទាហានខ្មែរក្រហម ហើយម្នាក់ទៀតជាប្រជាជនដែលឆ្លាប់បានឆ្លងកាត់ដំណាក់កាលនៃការអនុវត្តនយោបាយឈ្នះ ឈ្នះ។
ដោយមានការយកឆ្នាំ១៩៩៨ ជាបន្ទាត់នៃការប្រៀបធៀប ខ្លឹមសារនៃវីដេអូត្រូវបានបែងចែកជាបីផ្នែកគឺ៖
- ផ្នែកទី១៖ ការរៀបរាប់ និងបង្ហាញពីព្រឹត្តិការណ៍សំខាន់ៗនៃកម្ពុជាមុនឆ្នាំ១៩៩៨
ខ្លឹមសារអំពីអតីតកាលផ្តោតលើព្រឹត្តិការណ៍មុខឆ្នាំ១៩៩៨ ត្រូវបានរៀបរាប់ក្នុងផ្នែកទី១ ដោយក្នុងនោះរួមមាន៖ (១) អស្ថិរភាព សង្គ្រាមស៊ីវិលរ៉ាំរ៉ៃក្នុងប្រទេស ចន្លោះឆ្នាំ១៩៧៩ ដល់ឆ្នាំ១៩៩៣ (២) ការផ្តួលរំលំរបបកម្ពុជាប្រជាធិបតេយ្យ ឆ្នាំ១៩៩៧ (៣) វិបត្តិសង្គម និងបញ្ហាប្រឈមដែលកម្ពុជាជួយប្រទះ ហើយត្រូវការដោះស្រាយជាបន្តបន្ទាប់។
- ផ្នែកទី២៖ ការរៀបរាប់ និងបង្ហាញពីព្រឹត្តិការណ៍សំខាន់ៗនៃកម្ពុជា ក្រោយឆ្នាំ១៩៩៨ រហូតមកដល់បច្ចុប្បន្ន
ខ្លឹមសាររៀបរាប់អំពីព្រឹត្តិការណ៍ក្រោយឆ្នាំ១៩៩៨ របត់នយោបាយ សន្តិភាព និងការបង្រួបបង្រួមជាតិជាលើកដំបូងក្នុងប្រវត្តិសាស្ត្រ ក្រោមការអនុវត្តនូវនយោបាយឈ្នះ-ឈ្នះ ត្រូវបានបង្ហាញនូវក្នុងផ្នែកទី២ នៃវីដេអូ។
- ផ្នែកទី៣៖សមិទ្ធិផលនានាដែលកម្ពុជាទទួលបានក្រោយការអនុវត្តគោលនយោបាយឈ្នះ-ឈ្នះ និងការបង្ហាញនូវទំនុកចិត្ត និងភាពជឿជាក់លើអនាគតរបស់កម្ពុជា។
ខ្លឹមសាររៀបរាប់អំពីគុណតម្លៃនៃនយោបាយឈ្នះ-ឈ្នះ ដែលជាកេរតំណែលប្រវត្តិសាស្ត្រដ៏ថ្លៃថ្លា សម្រាប់យុវជនជំនាន់ក្រោយដែលជាអនាគតរបស់កម្ពុជា។
៣.យន្តការផ្សព្វផ្សាយ៖
បន្ទាប់ពីត្រូវបានផលិតបានជាសមិទ្ធផលសម្រេច ភាពយន្តឯកសារប្រវតិ្តសាស្ត្រ «កម្ពុជា៖ បន្ទាត់ឆ្នាំ១៩៩៨» នឹងត្រូវបានយកទៅប្រើប្រាស់ ធ្វើការផ្សព្វផ្សាយ និងចាក់បញ្ចាំងដូចមានការរៀបរាប់តាមដំណាក់កាលជាបន្តបន្ទាប់គឺ៖ មុនការសម្ពោធ (Pre-Launch) ការសម្ពោធ (Launching) ការផ្សព្វផ្សាយក្រោយការសម្ពោធ (Outreach) និង គោលដៅចុងក្រោយ (Final Destination)។
កន្លងមកក្រុមការងារបានធ្វើការផ្សព្វផ្សាយមុនសម្ពោធ ដោយបានបង្ហោះជាPoster និងជាវីដេអូសម្រង់ប្រសាសន៍ខ្លីរបស់ឥស្សរជនដែលជាតួអង្គក្នុងភាពយន្ត ជាបន្តបន្ទាប់ (អំឡុងសប្តាហ៍ទី៤ នៃខែតុលា) ហើយក្នុងសប្តាហ៍ទី១នៃខែវិច្ឆិកានេះដែរ ក្រុមការងារបានបង្ហោះជាវីដេអូTrailer ដើម្បីទាក់ទាញចំណាប់អារម្មណ៍របស់សាធារណជនឱ្យរងចាំទស្សនាភាពយន្តឯកសារនេះ ដែលក្រុមការងារនឹងសម្ពោធនៅក្នុងថ្ងៃទី៦ ខែវិច្ឆិកា នេះ។
